Trail

Halika
maglakad tayo pabalik sa baybayin ng ating mga pangarap.
Ngalumatang baliktanawin ang kahapong puno ng pangako.
Liwanag ng mukhang sumasalo sa silaw ng araw
Inosenteng mga mata
Tumitig na walang mantsa ng malisya
Ang pakiramdam, dala ng pagod sa pagtakbo
Hingal ng ligayang wagi sa karera
Ang paninikip ng dibdib sa naguumapaw na sabik at kaba

Halika
iwanan muna natin ang bangin ng alanganin.
Punasan ang luha at ipikit ang mata sa nangangantiyaw na pait ng kasalukuyan.
Ulong nakakulong ang hugis sa dilim ng anino
Namamagang bukana ng pananaw
Nakatingin sa kawalan binakasan ng karahasan
Nanghihinang mga tuhod na sugatan
Paghabol ng hininga habang umuusad palayo
Pagdurugo ng pusong manhid na sa kirot

Halika
Unahan natin ang kalawakan ng kaharian ng kagalakan
Tingalain ang langit at hagkan ang pag asa ng bukas
Bagong hilamos na pisngi
Paninging naglilinaw
Ngiting labing dadampi sa ligaya
Kinaros na langib sa sugat na naghilom
Paghupa ng bagang lunod sa halimuyak ng umaga
Kaluluwang sabik makipaglaro sa yapos na inaasam

Halika na
Alanganin man ang patutunguhan
Mabuti nang lumakbay
Kaysa mapagiwanan

Halika na
Babalik man sa pinanggalingan
O salubungin ang patutunguhan
Umusog na sa kinatatayuan

Dawning

hilom na ang sugat
ni wala ngang peklat
limot na ang sakit
ni wala ngang pait

nakalipas na
natapos na

ngunit bakit bigla akong nakaramdam ng konting pitik
sa puso kong matagal nang nanahimik?

Kay Lamig ng Umaga

ang sarap mamaluktot sa ilalim ng kumot
dama ang init ng yakap mo
ang sarap matulog sa payapa ng sandali
dama ang haplos ng iyong mga daliri

lecheng alarm yan!
bakit mo ako ginising?
ayoko na sanang matauhan
na wala ka naman sa aking piling!

Writs

mabuti nang ang pluma ang dumugo ng tinta
kaysa sa paeteng hihiwa sa puso kong nasira ang sinta

Traces

sa araw ng paglisan mo
marahan kang lumabas sa pinto
ayoko na magising ako
ayoko na ang maalala ko
ayoko na ang huling imahe mo
ay ang iyong likod na papalayo

Curtain Call

sa mata ng publiko
may ikaw at ako

pagbaba ng entablado
magkanya kanya na tayo

The Words Get in the Way

Bakit ba ang pinakamagagandang kataga magmumula sa pinakamapait na yugto ng buhay?
Bakit ang pinakasimpleng tanong namumulaklak bigla pag nalalagyan ng kahit isang guhit ng damdamin?
Bakit nga ba tila musika ang naririnig kahit ingay ang sinasambit basta't may konting kalinga sa nagbanggit?

Nagdurugo na ang puso nakukuha pang sabihin na "ang lahat ng ito'y para sayo." Kung sa ordinaryong pagkakataon lang, wala namang masyadong impact and mga salitang yan. Ngunit dagdagan mo ng sakit at pagdadalamhati, kulang na lang humagulgol ka sa iyak, tiyak, may kirot sa puso ng makakarinig.

Eh ano naman ngayon kung "nagkakaintindihan na kami?" Kung ba naiintindihan ka ng ibang tao, makabuluhan ba ang pagkakaintindihan niyo? Pero kung dramang you and me against the world yan, talaga namang sometimes it feels like you and me against the world!

"Kumain ka na ba?" Kung ang nanay mo ang magtanong niyan, ang sagot mo lang "busog pa ko" o di kaya "mamaya na" pwede ring "anong ulam?" Pag si crushie ang nagtanong, pasweet effect ka pa na "hindi pa, gutom na nga ako eh" kahit na bondat ka na sa maghapong pagkain! Para sa'yo, concerned siya. Uuuy! Hoy! Gising! Hindi dahil tinanong ko kung kumain ka na, head over heels in love na siya sa'yo! Pero dahil sa ilusyon mo, ang "kumain ka na ba?" katumbas na rin ng "I love you three times a day!"

"Sweet dreams!" Oo, garantisado ang mahimbing na pagtulog kung masabihan ka nito. Eto yata ang katagang kontra bangungot eh. Kung bangungutin ka naman, isisisi mo pa sa kanya kinabukasan na hindi effective ang "sweet dreams" niya habang ikinukwento mo and bawat detalye ng bangungot mo. O diba? Eh di may napag usapan pa kayo!

Hindi mauubusan ng salita ang taong may pagdama. Ngunit kapag katahimikan na ang sumagupa, marahil ang puso'y tuluyan nang payapa, at kuntento na. Hindi na kailangan ng salita sa tunay na pag unawa.

Kasabay ng Pagpatak ng Ulan

Nagising ako sa gitna ng bukang liwayway at umaga. Sa oras na ang mga tala ay maningning paring nagkikislapan. Ang buwan ay papalubog at ang araw ay nagsisimula nang sumilip sa silangan.

Sa gawing timog maririnig ang awit ng maya pinapalitan ang magdamag na bulong ng kuliglig. Ang ihip nang hanging sumasaitsit sa mga kawayan, kung pakikingang mabuti, tila boses ng nilimot kong sinta.

Sumilip ang haring araw ngunit nagtago rin sa madilim na anino na nagpakulimlim sa kalawakan ng langit. Mga nagbibigatang ulap na dala ang luha ng mga diyos. Ano mang oras ay nanganganib nang bumagsak.

Isang patak ang dumapo sa yerong bubungan, sinundan pa ng isa na kumatok sa bintana. Sunod sunod na pagpitik sa mga dahon ng papaya. Dumaloy ang katas ng langit sa biyak ng lupa.

Kay lamig ng dampi ng hangin sa aking basang balat. Tingala kong minamasdan ang isa isang pagdating ng mapaglarong wisik. Sadyang bagsak ng hubad kong paa sa naipong tubig sa kalsada. Humagikgik sa tuwa. Mata'y nangingintab. Dama ang init sanhi ng balat na pinagdikit. Sa gitna ng karimlan, ika'y natagpuan at ako'y inangkin.

Ang Plastic! Bow!

Non biodegradeable
Harmful yan sa environment

Ang mga imburnal at canal
Mabaho
Naipon ang tubig
Pinamugaran ng lamok
Pinagmumulan ng sakit

Bakit?
Dahil sa plastic na bumara

Barado
Pigil ang pagdaloy
O baka nga wala nang dumadaloy
Nabulok na ang basura

Hugasan mo ang dumi
Linisin ang sistema
Ayokong ngang mangati
Sa microbyo n'yong mga tanga!!!

All Sales Final

kung ano binigay ko
iyo na yan
hindi ko na babawiin

pero pwede bang
pakibalik na lang
yung ninakaw mo?